政情：泛民拒協調 大埔區會流會沒完沒了

根據《區議會條例》，每個區議會大會須有正副主席在場方可正式舉行，若有任何一名區議員競選主席或副主席，必須取得一名區議員動議、兩名區議員和議，先可以進入競選程序。而現時大埔區議會目前只剩下8名區議員在任，當中兩人係當然區議員，剩下6人屬泛民主派，照道理補選副主席應冇難度。之不過，據悉雖然區鎮濠已公開表示有意競逐副主席，但未能取得姚鈞豪及何偉霖嘅支持，加上譚爾培亦搖擺不定，令區鎮濠欠缺足夠票數，就算獲得主席毛家俊同前任副主席劉勇威嘅支持亦於事無補。

其實大埔區議會泛民主派之前就多次傳出爭議，其中去年9月選主席時，前區議員陳振哲就反對劉勇威做主席，批評劉冇撥出薪金畀社區支援；而喺劉勇威離任副主席職務前，姚鈞豪曾喺社交平台「公審」劉勇威，質疑劉會否遵守協議。此外，有意見亦指雖然可以將民生事務放落轄下委員會度討論，不過就被質疑難以取代大會本身嘅作用，包括做唔到授權人選提名、機構尋求報名、通過活動報告，甚至令部分工程項目難以通過。