政情：議政不力 立會新丁少人識

香港民意研究所喺上月4日至7日，用電話訪問1,014名市民，並於未經提示下，講出最多10名最熟悉嘅議員，以了解佢哋對立法會議員嘅熟悉程度。結果最多受訪者提及嘅議員包括葉劉淑儀、何君堯、田北辰、梁美芬同周浩鼎等。之不過，有8%受訪者所講嘅人名並非任何現屆立法會議員，至於話唔認識立法會議員嘅受訪者就有49%。另外，該研究所喺上月19日至22日，再用電話訪問1,001個市民，睇吓佢哋對立法會議員嘅評分。其中田北辰排首位，惟100分滿分，獲50.9分，僅僅合格，其次為葉劉淑儀47.7分，然後為梁美芬及何君堯。

香港伍倫貢學院社會科學院助理教授李敏剛表示，受訪者對議員表現以不支持居多，而多數議席非以地區直選產生，受訪者對一眾議事廳內嘅議員並不熟悉，亦覺得佢哋議事質素不高，關注度自然大減。李又指出，現時好多議員利用網上平台批評時政，然而發言只屬單向，無法達到接受訪問、或落區同民眾討論及聽取民意嘅效果，從而令市民對政府管治失去信心。時事評論員劉銳紹同樣認為，有議員未能做到反映民意，質疑變成一種利益嘅凝聚。