昔日東方政情：郭榮鏗去紐約開律師行
口講冇計劃離港
前公民黨創黨成員、被DQ嘅前議員郭榮鏗2020年底宣布退出政壇後，旋即遠走加拿大並計劃申請重新入籍，又喺美國哈佛大學甘迺迪學院（Harvard Kennedy School）出任2021至22年度亞洲學人（Asia Fellow）。佢最近又有新搞作，喺紐約開律師行，仲好寸嘴咁話「移民定移居who cares（誰在乎）」，叫人「慳啲啦」。其實郭前年宣布退出政壇時，聲稱並無計劃離開香港生活，但依家就喺外國生活，前言不對後語，唔知要「慳啲啦」嘅係佢自己定人哋喇。
郭尋日喺社交平台Facebook貼文，表示搵到拍檔，可以喺紐約開律師行，繼續做法律工作。佢上載咗張律師行所在嘅大廈照片，話紐約最繁華高檔嘅地段、第五大道（New York Fifth Avenue）嘅租金，較香港嘅中環同金鐘都仲要平，又話第時若果有香港人經過，歡迎上嚟搵佢飲杯咖啡喎。
寸嘴唔知叫邊個慳啲
佢又話，未來嘅日子，除咗從事法律工作外，亦會繼續喺哈佛大學甘迺迪學院擔任資深學人，做吓學術研究，同學生分享經驗，唔知係咪同學生分享反中亂港嘅經驗呢？
最後佢仲好寸嘴咁加咗幾個標籤，包括「#移民定移居who cares」、 「#慳啲啦」，不過佢就始終無交代自己係移民定移居，至於佢係叫邊個「慳啲」就不得而知喇。
政界質疑受美國關照
有政界人士就質疑郭之所以可以喺紐約開律師行，係受到美國關照，又指郭身為大律師，對移民或移居嘅法律概念應該好清楚，形容郭只係揣着明白裝糊塗。另外，本身係執業律師嘅議員張國鈞都話「郭榮鏗幕後大老闆係邊位？相信大家心中有數！」指郭叫人衝自己鬆，形容係人血饅頭。
港府喺2020年11月宣布取消4名時任立法會議員嘅資格，當中包括公民黨議員郭榮鏗。郭榮鏗同年年底宣布退出政壇後，旋即取道英國，輾轉前赴加拿大並計劃申請重新入籍，又喺美國哈佛大學甘迺迪學院（Harvard Kennedy School）出任2021至22年度亞洲學人（Asia Fellow），更於2021年4月退出公民黨。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
