政情：徐英偉辭職失蹤 鋪欖球場相靜極思動

相隔4個月、經歷「洪門宴」事件後，徐英偉再度貼文，喺個人Facebook帳戶發布一張欖球場嘅草地相，寫住「終於有機會攞番件新嘅教練衫」，並配以欖球圖案。多名政界人士留言打氣，亦有網民留言問：「勞動節復出，有否微言大義？」莫非徐英偉正準備有新搞作？

據了解，徐英偉離職後亦有參與民間抗疫活動，例如幫手拎啲抗疫物資去社福機構咁，但整體都比較低調喇。至於欖球方面，原來徐一直以嚟都玩開欖球，亦都擁有教練資格，佢都曾經喺過往政府宣傳片中，以欖球裝扮示人。佢早年都曾經因為希望培養仔仔嘅興趣，同仔仔一齊上堂玩欖球。而因為今年初疫情嚴峻，運動場所一度關閉，所以徐都暫停咗教波一段時間囉。

徐英偉今年1月3日參加選委洪為民生日派對，多達13名政府官員及20名立法會議員捲入事件。其中由於徐主力地區抗疫工作，事件引來公眾抨擊，加上徐當晚逗留時間較其他官員時間長，又在場用膳，同其他出席者喺餐桌以外地方聊天時，更加冇戴口罩。最終因有確診者曾到場，佢需要入住竹篙灣檢疫中心。

事發後，佢喺Fb專頁上致歉，承認錯誤，愧對市民大眾對其信任和期望，會吸取教訓，並指「願意承擔及彌補，承受該受的處理」更一度換上黑色頭像。而其Facebook專頁亦於1月底被發現已關閉，早於政府公開調查報告。

特首林鄭月娥曾先後兩次喺記者會上公開表示對徐感到特別失望，因為徐身為抗疫主要官員，但警覺性嚴重不足。林鄭當時又話問責制對官員要求高，需要時刻對個人行為謹慎，不可為政府帶來尷尬。政府於1月31日公布調查結果，當時徐已主動請辭。林鄭亦表明接納徐的請辭，認為顯示問責制的精神，並會向中央報告，免去徐的職務。而國務院喺2月24日決定，免去徐英偉嘅民政事務局局長職務。