政情：政府逼交染疫寵物 陳沛良籲釋疑

因囡囡近來飼養狗隻，陳沛良十分理解寵物主人嘅心情。佢話即使交出嘅寵物，有關當局聲稱會妥善處理，然而寵物同人一樣，身處陌生環境都會惶惑不安。更何況今年年初，大批倉鼠遭到人道毀滅，政府抗疫不惜防微杜漸，咁做難免會令到好多飼主感到不安。佢話政府喺維護公共衞生安全之時，亦要體恤市民情緒，而清晰交代當局處理有關寵物嘅執行細節，佢相信係一個可取嘅做法。

至於寵物一旦被政府要求交出，寵物保險能否提供保障呢？從事保險業嘅陳沛良話唔得。佢解釋話時下嘅寵物保險，通常只係涵蓋醫療、手術或第三者責任，而傳染病，係唔包㗎。佢又話寵物保險嘅投保對象只得兩類，就係貓同狗，若果以雀鳥為寵物的話，咁就冇得投保啦。