政情：鍾國斌嘆航班熔斷 重擊港商貿

鍾國斌日前喺一網絡訪談中提到，話相較好多恢復開放嘅地方，香港嘅防疫政策即使有所放寬，依然屬於嚴格。佢話有乘客染疫，點解要懲罰航空公司呢？況且入境香港嘅旅客，登機前同入境後都要做檢測，又要隔離一個禮拜，有咩事都發現咗啦，點解要熔斷航班唔准飛過嚟呢？其實唔准飛嚟香港，對外國嘅航空公司而言並非大不了嘅事，但對於作為航運中心嘅香港就並非好事。鍾又批評目前嘅防疫措施對於做出口生意尤其不利，佢話啲賣家入唔到嚟，又做唔到展銷會，就算本地人飛出去外國洽商，但返嚟又要一個禮拜隔離，長此下去對香港整體嘅出口同外貿，都會帶嚟嚴重嘅殺傷力！

鍾國斌又指，做生意唔怕有風險，究竟會蝕幾多，畢竟有數得計，其實做生意重要嘅係可預見嘅穩定環境，然而香港依家就相反，充斥好多不明朗因素，譬如幾時通關？唔知。外國商會向政府提意見，唔聽。下一屆政府班子同施政理念，唔清楚。當生意人都唔知你想點，又何以安心營商呢？所以依家有啲外商，執緊包袱走緊啦！