政情：吳文遠刑滿出冊 第一時間剪靚髮

吳文遠尋日離開喜靈洲懲教所，有多名親友到場迎接，當中包括社民連主席陳寶瑩，而吳亦感謝支持者嘅關心。佢提到即使已經出獄，呼吸自由空氣，但仍有窒息感覺，不過佢強調「人都要繼續做人，嘢都要繼續做，路都要繼續行」，仲指過往以為入獄一年已很長，但如今一年刑期已屬「濕濕碎」，期望仍在獄中嘅戰友「頂住」。不過被問到會唔會擔心再因其他案件被捕入獄，佢就話自己行得正企得正，冇得好驚喎。

出獄之後，吳文遠仲立即喺社交平台發貼，上載剪髮照片，指自己喺喜靈洲度假咗一年，一落船第一時間剪番個髮先，亦都話自己身材fit咗，睇咗百幾本書，甚至形容為「出冊仲快樂」。其實吳文遠在囚期間，佢嘅社交專頁仍相當活躍，不時分享時事同傳達自己嘅詼諧想法，佢喺入獄前更預錄好多影片，包括慶祝多位政界好友生日，笑言自己要「刷一下存在感」。

雖然吳重獲自由，但事實上多名社民連骨幹仍喺獄中，當中包括黃浩銘、梁國雄同岑子杰等人。其中黃浩銘涉及2019年10月20日九龍遊行案，囚14個月，而梁國雄同岑子杰因牽涉泛民初選案以及其他案件，均正在監獄服刑。另外，前民陣召集人兼社民連成員嘅陳皓桓亦因5宗遊行及集會案而被判監22個月，同為成員嘅前東區區議員曾健成則因7月1日遊行被判監10個月。