政情：發展北部都會區 周文港叫當區就業

周文港指出，北部都會區計劃一旦落實，預料區內嘅就業職位將會由11.6萬大增至約65萬，雖然數字頗為可觀，然而設定可容納250萬人居住嘅北部都會區，若以六成勞動參與率嚟計，職位應該要有150萬至啱。

觀乎芬蘭、南韓同台灣等地嘅經驗，北部都會區作為未來香港另一副發展引擎，必然以創科為首。然而創科行業並非人人都可以勝任，因此北部都會區需要發展多元產業，以免區內居民每日返工都要上演「動物大遷徙」嘅場面。

講到發展多元產業，周文港就引用內地學生到海外留學嘅統計，指2018年出國留學有66萬人，當中超過一半係去美國，選擇到香港則只得二萬人。周認為香港其實係具有良好嘅高等教育資源，而教育產業都可以係北部都會區嘅一個發展方向。佢又建議政府總部搬去北部都會區，指行政中心同經濟中心區分，係國際上好多地方嘅慣常做法。