政情：撤強積金對沖一味拖 梁子穎叫加速

勞工界議員梁子穎唔知係咪因為太心急，擔心條例草案有咩三長兩短，尋日喺立法會內務委員會上提出意見，話希望可以加快審議進度，內會主席則建議議員利用法案委員會嘅平台表達意見咁話。

內會開會期間，梁子穎發言提到，取消強積金對沖嘅條例草案下次召開會議時間係5月5日，前後已經召開3次會議，況且部分議員重複發表意見，希望委員會主席可以加快審議進度。內會主席就表示，其實議員應該喺法案委員會上表達相關意見，條例本身亦有爭議性，每個法案委員會處理嘅進度不一。

另外，內會主席亦交代與特首辦主任會面嘅情況，引述對方指本屆政府計劃喺餘下任期提交12項法案，包括《內地民商事判決（相互強制執行）條例草案》、《院舍雜項修訂條例草案》、《版權修訂條例草案》等，希望立法會盡快審議同埋通過相關法例。