政情：中大續聘段崇智議員去信表質疑

喺2019年嘅反修例運動，好多大學烽煙四起，至今多名校長約滿離任。但香港中文大學校長段崇智6年任期尚餘一年多之際，近日就獲校董會同意，可以做多3年校長，至2027年。之不過，呢個安排並非人人都信服，相關爭議亦持續發酵。繼早前有議員批評段喺黑暴期間嘅表現，令中大蒙上「暴大」污名。近日就再有多名議員加入戰團，其中議員何君堯同陳月明都去信教育事務委員會主席，指決定惹起社會關注，希望下次開會討論，甚至邀請校方出席，當面解釋續聘嘅原因喎！

何君堯喺信中指出，政府每年撥款200幾億元畀大學教育資助委員會，就係協助大學嘅運作同教學能保持優良水準。然而近年各所大學嘅水平同學生質素惹人擔憂，尤其是反修例時期，好多大學生違法，當中又以中大學生嘅被捕人數位居前列，被冠以「暴大」之名。

斥校方管理層失職諮詢欠透明

何批評有學生以「暴大」為榮，指校方管理層肯定有人失職，但校董會通過續聘段崇智，仲話佢喺校內諮詢獲得「廣泛支持」，對校方決定深表驚訝。另外，議員陳月明亦有同樣關注，佢指收到好多朋友，甚至喺打鼓嶺區嘅家長反映，指續聘同諮詢過程應向公眾解釋，佢亦都希望下次會議可以討論呢件事，故去信教育事務委員會主席，邀請中大派代表出席，以釋除社會各界疑慮。

其實中大校董會成員、議員劉國勳早前已批評段崇智喺黑暴期間，立場唔夠堅定，中大校友兼議員麥美娟亦指，段要帶領中大走出「暴大」標籤，同時應該推行真正嘅國情教育。根據立法會資料顯示，下周五（5月6日）將會召開教育事務委員會，之不過暫時就未見相關討論文件，但由於事關重大，估計都會列入議程討論喇！

另外，政府尋日宣布，行政長官已以其香港中文大學監督嘅身份，接受中大校董會提名，委任查逸超教授為中大校董會主席，任期由2022年5月1日起生效，為期3年。查逸超曾出任香港科技大學校董會副主席同香港理工大學校董會成員，現時係中大校董，佢亦都係李嘉誠嘅外甥。