笑看天下：香港距美好城市太遠

時至今日，城市嘅發展一日千里，有所謂智慧城市、循環城市、綠色城市；在聯合國永續發展目標下，「永續城市」則被定義為「滿足經濟、社會與環境共好，並且具包容性、安全、韌性及永續特質嘅城市與鄉村。」嗱！香港曾自詡為國際大都會、亞洲金融中心，又話要追求「智慧城市」，然而，審計署日前發表嘅第77號報告書，數臭香港喺城市管理上一塌糊塗！

呢，老朽好早前都話「香城無處不飛花」就正啫，可惜香江一年365日，幾乎日日有噴泉！阿哥，係掘路、爆喉嘅「噴泉」！報告狂轟水務署多宗罪，譬如約30%鹹水管爆裂熱點於爆喉後平均4.5年仍未完成改善工程；鹹水管滲漏平均須22小時才關閉水掣等。更離譜嘅係，水務署耗約13億元建設港島薄扶林及新界西北嘅海水供應網絡延伸部分項目，圖以海水代替淡水沖廁，之但係網絡完成8年卻遲遲不使用，造成驚人浪費及環保災難！

仲有就係路政署每年耗資逾億元公帑，保養及維修公共行人路，惟審計署早前抽查20個修復項目，但截至去年中僅6個項目完工，其餘不是延遲就推搪係因為臨時交通安排。事實上，居住喺香港呢個城市，除咗常年遇到爆水喉，就係一年四季都見到修路工人如蜜蜂般辛勤在挖路，一邊挖完、修好，無耐又挖另一邊，沒完沒了！香港打造智慧城市？風季來了，先通好渠修好樹木防山泥傾瀉先喇！