政情：返港酒店隔離 梁繼昌住曾江同層

原來Kenneth同前日離世嘅藝人曾江住同一間酒店，仲要係同一層，只係隔一兩間房咋。話說Kenneth前日都聽到酒店職員嘅拍門聲，對於曾江嘅離世感到好傷心。佢認為政府可以將單獨嘅年長人士安排去設備比較好嘅酒店，而酒店亦要有醫護人員24小時當值，以免悲劇再次發生啊。

至於尋日係Kenneth酒店隔離嘅第3日。佢話其實處理吓公事、做吓運動，啲時間都好快過，不過膳食方面就真係要檢討一下。佢話自己入住嘅隔離酒店，可供選擇嘅膳食若以分量同埋味道而言，都係合格嘅，但佢就嫌每餐都係白飯同埋含糖飲品，澱粉質、糖分都大超標啊，尤其唔適合高血糖或糖尿病患者長期食用。而佢就惟有盡量選擇蔬菜嘅餐點，或者將啲含糖飲品送畀其他人飲。