政情：林新強爆蝦碌 咪高峰當耳筒

其實發言時戴咪，可以話議事堂內嘅基本動作。而輪到林新強發言之時，佢先係調整稿架高度，但就冇留意自己冇戴咪。其後代主席多次提醒佢冇戴咪，但林新強就似乎聽唔到。直到工作人員為佢遞上咪，專心睇稿發言嘅林新強並無細察，一手就拎起個咪，繼而塞咗落耳仔度。後來佢可能發覺點都塞唔入，又或者突然醒起個咪唔係耳機。佢稍為調整一下之後，就將個咪夾番喺件外套度，繼續發言喇。