政情：溫和達飲頭啖湯 提早出海釣墨魚

溫和達日前喺社交平台上載幾張釣墨魚嘅相，溫話自己與親友喺上周末晚上約7點上船，到馬鞍山對海面夜釣墨魚，佢話嗰日唔算好多收穫，只釣得約20隻墨魚，笑言如果遲多一個月，待旺季再去釣應該會好啲。咁今次啲戰利品點樣處理？佢話以往會同朋友攞去餐廳度煮嚟一齊享用，但現時因為疫情關係，惟有攞返屋企自己煮啦！

佢仲好專業咁話，釣墨魚一定要搵啲水流冇咁急嘅地方先好㗎。衣着方面，最好就着黑色衫，因為墨魚釣上嚟之後會噴墨汁，有機會噴到件衫㗎！就好似佢咁，就畀墨汁噴到件衫同眼鏡喇！