政情：議員交政策研究「點心紙」 9項目跑出包括青年安老

早前立法會18個事務委員會向內務委員會申請成立研究政策事宜小組委員會，總共有17個咁多。究竟邊啲項目應該優先處理？唔係一個人可以話晒事，於是秘書處就派「點心紙」畀議員考慮，尋日結果出爐喇！估吓邊啲係議員嘅心水？有長遠青年政策、鐵路同增加安老院舍宿位。

秘書處提交嘅文件話，喺本月22日限期屆滿時共有79名委員交番張「點心紙」，當中有72名議員話應該分配9個名額畀政策事宜小組委員會即時展開工作，而最多議員同意嗰9個項目就會即時展開工作。

邊9個項目？包括大灣區發展、長遠青年政策同發展藍圖、國民同國安教育、鐵路、增加安老院舍宿位、改革扶貧政策同策略、改善基層住戶居住環境同埋發展智慧城市等。呢啲項目會即時展開工作，而剩低嗰8個就會列入輪候名單，等有名額騰空時再展開工作。