政情：跑輸畀仔仔 王威信：好彩唔使入院

王威信日前喺社交平台貼文，分享佢同仔仔一齊喺元朗站同埋南生圍一帶跑步。佢話自己昔日都叫做長途健將，點知今次就跑到頭昏腦脹喎，仲要畀仔仔放到甩轆，好彩佢最後都返到屋企，唔使轉入博愛醫院。隨文附上，佢同仔仔嘅合照同埋佢企喺博愛醫院前嘅照片。因為疫情仍未放寬口罩令，二人仍然佩戴口罩跑步，但淨係望到對眼都感覺到王上氣唔接下氣。

有網民留言叫佢帶仔仔去球場踢番場波，見識吓老竇踢波幾勁，不過睇嚟王都好有自知之明，就講笑話踢完都唔知返唔返到屋企喇。亦有網民提醒佢可以跑到南生圍時，畀7蚊船家，然後返元朗市中心，而王就回應指自己身上莫講話7蚊，就連7毫子都冇啊，搭唔起船，都係跑番屋企算啦！