政情：陳年電腦書「出土」 陳智遠嘆知識貶值

原來陳智遠所指嘅「文物」，其實係一本厚如磚頭嘅電腦工具書。話說陳智遠喺中學時代，已預見電腦時代即將到臨，然而學校當時並無電腦堂，要盡早掌握電腦相關知識，於是就購買書籍番屋企「慢慢刨」。佢話摷番呢本工具書，就想起當中有部分內容的確艱深，惟有睇啲自己睇得明嘅章節，結果本書睇咗幾個月，都仲未睇得晒！而當年通過工具書自學得來嘅電腦知識，去到連小學生都懂得用電腦嘅今日，已告落伍，大嘆昔日所學已遭時代淘汰，真係唔認老都唔得咁話。

陳智遠又話，社會進步有賴不斷咁推陳出新，所以知識貶值係難以避免。雖然舊日嘅工具書，某程度上係昔日電腦世界嘅一個見證，但礙於香港居住空間太矜貴，就算係「出土文物」都要攞去廢紙回收喎。