政情：研發抗疫裝置 陳恒鑌賣關子

究竟阿Ben乜嘢葫蘆賣乜嘢藥呢？從佢上載社交專頁嘅幾張照片，只見佢企喺附有冷氣機同抽氣扇嘅鋁窗旁邊、一個看似窗框嘅物體、地上嘅鋁通、一塊透明膠簾……所謂線索就係得咁多嘞，真係睇到一頭霧水啊！雖然阿Ben嘅黨友、議員林琳知道箇中情況，但佢相當口密，兩片嘴唇好似上咗拉鏈一樣，堅決唔肯透露半句。

之不過，後來阿Ben都肯講多少少。佢話有見疫情重創安老院舍，於是就聯同黨內專業事務委員會成員，以及本地科研公司，研發安裝喺院舍裏面嘅負壓裝置，至於具體說明及細節，日內將會公開交代，依家就暫時賣個關子咁話。