政情：撤積金對沖會議爆舌戰邵家輝張國鈞火氣盡現

取消強積金對沖安排討論多年，相關委員會尋日以視像形式舉行第3次會議。會上多位勞工界議員都關注何時去到逐條審議階段，又憂慮政府履行唔到本屆完成法例審議嘅承諾。對於加長會議嘅主張，委員會主席張國鈞就引述《內務守則》，指應該3個月內完成委員會工作，但估唔到張嘅說話竟觸動到批發及零售界議員邵家輝嘅神經，後來仲演變成一場舌戰添。

勞工處處長孫玉菡喺會上強調，相關議題橫跨兩屆政府，而現屆政府係有好大決心，指議案已經作出平衡。跟住張國鈞就提醒議員應合理提問，唔希望大家喺重複嘅問題上糾纏，且對會議進程冇幫助。

張斥不能因反對拒開會

但當議員邵家輝發言，就開始有火藥味喇！邵話過去並無聽聞法案委員會要3個月內完成工作，重要議題不應匆匆通過。邵又指早前立法會呼籲議員盡量唔好返辦事處開會，疫情期間無法面見商界人士攞意見，又指張喺上月強行開兩次會議，繼而指摘張喺上個月，話無關疫情嘅會議應該盡量唔開，公聽會又冇下文。

面對邵嘅批評，張就話「邵議員你要公道啲，睇番最近禁止追租條例草案嘅委員會，貴黨主席都開兩次會完成審議，亦都係疫情期間以視像會議進行」，繼而反問邵「我有冇質疑點解咁急、點解疫情期間開會、點解冇開公聽會？」又回嗆話「邵議員你唔可以你支持嘅法案就開會，而你唔支持就唔開會，呢度唔係得你一個！」

邵：唔係主席就一定啱嘛

張一輪質問之後，邵反駁指禁追租係救命，唔可以同討論多年嘅強積金類比。邵跟住補多句「唔係因為你（張國鈞）係主席，就一定啱嘛！」邵又話委員會應該一開始就交代公眾諮詢嘅事項，排喺後面嘅議程，好多委員都返屋企喇。張國鈞聞言，即刻反擊話「點會呀，開會時間議員點會返屋企呀？就政策方向究竟你有冇問題要問啫？」最後，邵提出政策相關嘅提問，爭執亦隨之落幕喇。

眼見張同邵唇槍舌劍，議員鄧家彪就笑言，後悔當初提名張國鈞做主席，議員意見不一令張成為磨心，又指張過分寬鬆畀議員連續發言20分鐘從未見過。當邵家輝第二次發言，就話張國鈞主持會議好公道。邵點解今次咁忟憎？佢解釋話，係由於公眾唔知公聽會已經變成提交意見書，同埋聽到3個月完成工作即刻彈起。