政情：仔仔滿十二朝 楊永杰派薑醋券

按中國人習俗，婦女誕嬰後十二朝方可接觸外界，而當天亦可開始向親友分享薑醋。而楊永杰一索得男剛滿十二朝，所以佢亦依循傳統做法，向區議會同事派薑醋券。作為新手爸爸，楊永杰話仔仔出世第一日，佢連點抱都唔識，到依家都算熟手。平日就係佢老婆主力照顧仔仔，仲話老婆最叻執手尾，所以換片、餵奶都交畀佢。況且楊要返工幫唔到幾多，但就有請陪月咁話。

其實楊身為雙料議員，真係夠時間湊仔咩？佢就話攰嘅，有時夜闌人靜都會畀個仔搞到「成個醒晒」，呻話每日都瞓得幾個鐘咋，但幸好尚處於壯年，總算應付到啦。