昔日東方政情：鄭家朗流亡 帶埋枕頭布公仔
早前自爆已「隱身」英國一年嘅前香港眾志副主席鄭家朗，年前曾以不置可否嘅態度嚟回應有關佢出走台灣嘅消息。而日前佢接受傳媒訪問時就證實喺《港區國安法》通過後，佢曾一度離港暫避，後來更透過「香港人道援助關懷行動專案」暫居台灣，今年3月轉赴英國，出走嘅佢仲帶埋由細陪到佢大嘅布公仔，甚至連枕頭都帶埋喺身邊。
鄭家朗話喺台灣留約一年嘅期間，曾獨居喺約180平方呎嘅套房，即使行裝有限，都盡量依照佢喺香港嘅住處去布置。雖然布公仔同枕頭都可以帶得走，但熟悉嘅人就帶唔走啦！佢憶述前年12月，前眾志黨友周庭等人因2019年包圍警察總部案，「煽惑他人集結」罪成被判囚。當時坐喺旁聽席嘅佢目睹周庭聞判崩潰，對方嘅眼淚令佢感到一個人即使話有心理準備，但真係去到嗰一刻其實都係手足無措。
講到流亡嘅感受，佢話無論去到邊度都唔會有家嘅感覺，話有時喺巴士上瞓着扎醒，觸目所及竟然唔係香港巴士上嘅畫面；而睇電視新聞，亦好難理解人哋嘅新聞邏輯，覺得好唔習慣。
爆媽媽曾勸唔好掂政治
佢又提到，原本極反對佢「搞事」嘅媽媽，見佢要出走難免傷感，又發晦氣咁同佢講，當初唔好掂政治就唔會落得如此下場。雖然如今母子分隔兩地，但鄭家朗唔擔心媽媽冇人照顧，因為媽媽喺前年年初已經再婚嘞！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
