政情：研究人才資助金額吸引力成疑

本港人才流失嚴重，但政府似乎並無積極增加誘因留住人才喎。話說創新及科技局局長薛永恒尋日出席立法會工商事務委員會嘅視像會議，交代創新及科技基金嘅最新進展。期間佢被議員問到研究人才庫資助計劃嘅金額，同18年前分別唔大，可以話毫無吸引力。但佢就反稱資助計劃有超過6,000人受惠，覺得好有吸引力喎。

18年來平均每項加2000

工業界議員吳永嘉喺會上指出，政府嘅研究人才庫資助計劃，資助金額同2004年分別不大。然而過咗18年，社會上嘅物價、通脹、薪金水平都不斷上升，但資助金額平均每項只增加2,000元，認為對招聘人才毫無吸引力。

不過薛永恒就唔係咁睇嘞。佢話現時嘅研究資助年期由24個月提升至36個月，基本上涵蓋所有研究行業，共有6,000多個研究人員受惠，當中超過2,000人係博士生添。佢又話，當局於2018年曾經檢討過當時嘅平均薪酬，相信資助計劃嘅金額仍然好有吸引力，仲話如果企業若覺得個別人士值得更高薪酬，政府都願意補貼喎。