政情：入境處以人為本 手語人員隔離營出動

多位聽障人士先後入住新田方艙醫院，入境處特登調派識手語嘅人員加入關愛小隊，每日主動探訪有特殊需要嘅隔離人士，務求令佢哋喺抗疫路上唔會覺得孤單。片段中可見入境處人員收到聽障人士求助後，安排手語服務同埋準備物資，向佢哋送上暖心嘅膳食，期間仲會用書寫配合手語同佢哋作更深入嘅交流。

人員又主動向聽障人士提供24小時聯絡熱線，等佢哋隨時可聯絡入境處。片段中又回顧早前一名染疫嘅入境處人員，入住隔離設施期間化身親善大使，好窩心咁為一個初生嬰家庭提供嬰兒浴盆。