昔日東方政情：梁子穎遊舊地 行百步梯喘晒氣
要行百幾級樓梯，唔好講話老人家，好多後生仔嘅都頂唔順啦！點解咁講？事關勞工界議員梁子穎都行到喘晒氣。
話說梁子穎日前喺社交平台上載咗段短片，片中見佢行緊樓梯，仲行到喘氣。事緣佢喺2008年開始有份幫葵涌邨爭取起升降機，升降機終於喺今個月初投入服務，附近居民出入就唔使行百幾級樓梯（百步梯）咁辛苦。
十幾年前爭取起升降機
佢日前再舊地重遊添！既然已經有電梯，點解仲要行樓梯？佢話要回味番十幾年前行134級樓梯嘅滋味，於是就一口氣行到上去，喘晒氣惟有坐喺度，仲話早年區議會撥款起咗啲櫈畀居民行到攰可以坐下，如果唔係仲辛苦。
佢話早年葵涌邨居民要去光輝圍一帶同買餸，都要靠邨內一條樓梯上落，條樓梯沿斜坡興建，有成134級，買完嘢撐番上去都幾辛苦吓！原先諗住起垂直升降機，因有山坡影響地理因素，經政府研究後改為起斜道式升降機。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
