政情：技術甩漏 食衞局線上會議又出醜

話說尋日嘅會議，議員梁熙發言期間出現線路唔穩定，令人難以聽清楚對話內容。當輪到醫管局代表回答議員質詢，鏡頭前嘅醫管局行政總裁高拔陞竟然只得半邊身，連個樣都睇唔到，本來要有「食物及衞生局」同特區區徽嘅藍色背景就唔見咗，反而得番一塊綠色布。後來高拔陞隔籬嘅職員就手指指，疑似畀手勢技術人員，無幾耐就轉番個背景。

本以為「蝦碌」嘢告一段落，但稍後輪到食衞局局長陳肇始發言，就直頭連畫面都冇埋。財委會副主席陳振英初時話「唔緊要嘅聽到聲。」然而黑色畫面持續不斷，無奈之下惟有暫停會議5分鐘，等相關人士解決技術問題先至繼續開會。