政情：搞錯環節發問 林琳照獲回應

話說林琳喺討論食物安全及環境衞生嘅環節，就問及中醫診所撥款、公務員對感染疾病培訓、以及檢討床位隔離設施。負責主持會議嘅財委會副主席陳振英就指出，林琳嘅提問應該屬於下一個環節所討論嘅事項。陳振英話音剛落，食衞局局長陳肇始就即刻「接波」，指林琳所提出嘅3條問題都係屬於衞生範疇嘅。儘管提問不符合當時嘅會議環節，不過陳肇始都有答覆林琳嘅提問。

其實林琳都唔係第一次搞錯議題喇，月前財務委會員開會討論綜援及公共福利金嘅時候，林琳就提出屬於財政預算案嘅問題，搞到出席會議嘅勞工及福利局副局長何啟明頓時瞠目結舌，場面相當尷尬。

林琳喺第一個環節提問屬於第二個環節嘅問題；議員邵家輝則相反，喺第二個環節問番屬於第一個環節所討論嘅問題！佢解釋話會議一開始實在太多人排隊發問，搞到佢冇機會喎。跟住佢就話本港現正面對發泡膠箱圍城，但政府冇反應、處理唔到。如果政府處理唔到嘅話，就算推展幾多環保工作都補唔番呀！陳肇始就話會同內地專家成員聯繫，推進相關工作喎。