政情：政府賴疫情阻人來港

創新斗室多吉房

作為吸引創科人才來港發展嘅硬件設施，位處科學園、具有511個住宿單位嘅「創新斗室」，舊年4月開幕之時曾被外界寄以厚望。不過近日政府提供嘅資料，創新斗室嘅入住率遜於預期。立法會尋日嘅財務委員會特別會議創新及科技環節中，有議員指創新斗室落成初期，政府曾形容將會一房難求。但近日為數不少嘅空房，反映並非如當初講到咁受歡迎，質疑政府吸引人才來港不力。創新及科技局局長薛永恒就回應話，因疫情關係少咗人嚟，先至住唔滿。相信疫情過後，來港嘅創科人才會有所增加喎。

60學人獲批僅十幾個現身

議員陳振英話，政府喺創新斗室推出時曾形容將會「一房難求」，但最新入住率卻得74%，質疑政府吸引人才來港政策力度不足。議員陳仲尼亦提到，喺政府推出嘅創科學人計劃中，雖然有60個學人報名，但真正來港嘅就只係得十幾人，又指香港嚴格嘅防疫規例，令到唔少人才失去嚟香港發展嘅意願。

科技創新界議員邱達根就指出，政府雖然喺科研方面投放大量資金，但舊年創新科技嘅GDP就只得0.99，同政府目標嘅1.5有一大段距離。邱又指，60個獲批核嘅創科學人中只有十多個已經來港，建議政府可以設立時限，例如限定需要喺批核後2至3年內來港。佢提到科技人才入境計劃目前只有200多人來港，但業界人力資源嚴重不足，空缺職位數以千計，敦促政府加快審批流程，增加人才來港發展嘅誘因。

薛永恒：逾七成入住率算唔錯

薛永恒回應表示，政府對科研投放嘅力度有增無減，但認為唔可以單靠政府嘅力量，亦要吸引私人投資。佢又指，創科界亦受到疫情衝擊，令創科學人同人才來港受到限制，政府願意等待心儀嘅學人來港，又認為喺疫情困擾下，創新斗室有超過七成嘅入住率已經算唔錯啦，相信疫情過後來港人才數目會上升喎。

政府咁容易滿足，又乜都可以賴疫情，難怪本港嘅創科步伐進展得咁緩慢啦。