政情：鄭泳舜快測中招 留家隔離

Vincent前日證實確診後，尋日喺社交平台指現時身體狀況尚可，已服食中成藥治療同居家工作，亦正在家隔離。佢話中招後已即時通報衞生署，並根據當局嘅「隔離令」自我隔離，希望盡快康復後，繼續喺抗疫前線為市民服務。另外，佢都不忘關心市民，指現時疫情依然嚴峻，呼籲大家出門上班或外出前，都應該先進行快速抗原測試，同時做好個人嘅防護措施。

染疫會唔會影響工作呢？佢就話佢嘅辦事處、地區服務團隊會繼續盡力為市民提供支援。但依家都用緊遙距視像開會，相信可以如常工作。

立法會秘書處亦收到Vincent確診嘅通知，話佢最近喺4月8日返過立法會綜合大樓6樓，亦到訪停車場；當日曾進行快速測試，結果係冇染疫。同鄭接觸嘅職員已進行快速測試，結果都係冇確診。秘書處已建議該等職員未來幾日在家工作同密切留意身體狀況。根據秘書處紀錄，當日有近130名議員及職員乘搭電梯進出綜合大樓6至8樓。為審慎起見，秘書處建議當日曾進出有關樓層嘅人士盡快進行快速測試。