昔日東方政情：財困賣車兼裁員 民主黨衰氣未完
曾是泛民龍頭嘅民主黨（白鴿黨），因多名立法會議員請辭、大批區議員辭職，目前只剩9名區議員，導致該黨嘅收入劇減，加上籌款晚會因疫情而停辦，喺去年就已經話將會出現逾百萬元嘅財赤，如果現金流捱唔到去今年年尾，恐怕難以維持地區工作。以致黨內決定縮減人手、賣黨車及售賣紀念品，以應付日常營運開支。若果開源節流都捱唔到兩年後嘅區議會選舉，衰氣纏身嘅白鴿黨會唔會就此亡黨呢？
由於年前白鴿黨已預料會出現巨額財赤，早前就賣出荔枝角一個物業套現。舉辦黨慶晚宴同獎券籌款，係一項重要嘅收入來源，但礙於疫情同政治形勢，周年晚宴無法舉行。再加上過往立法會議員每人需籌20萬元，惟該黨如今失去多個立法會議席，令黨籌少逾百萬元。
用1100萬支援在囚黨友
白鴿黨籌款委員會主席袁海文大呻時勢艱難，多名議員黨友因涉民主派初選案而被囚禁，再加上區議員黨友自行辭退、或遭政府褫奪議席，未能向黨上繳部分薪金。而過去一年該黨已經耗用300萬元資助地區據點，支援在囚黨友則用咗1,100萬，指目前財政狀況之惡劣，實屬該黨創黨28年以來最嚴峻嘅時刻。
會否再參選 要等中委傾
佢又話，知道未來有一定壓力，民主黨已決定出售黨車，員工人手縮減一半，未來將會計劃售賣紀念品，希望可以籌得款項應付日常運作開支，至於黨員日後會否再參選及未來路向？袁就話，相信有唔同黨員同中委商討後先再有決定。
其實喺去年，白鴿黨唔派人參選立法會換屆選舉，不但惹來外界質疑未來4年如何維持收入，亦加劇黨內分歧同內訌，結果主張參選嘅白鴿黨「元老」李華明，去年擅自以個人名義支持黨外立法會選舉候選人，而遭到凍結黨籍半年，然而因配合調查程序，故暫緩執行處分。但副主席梁翊婷、中委蘇逸恒則被革除黨籍，後者更離港赴英。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
