政情：疫後易攰 梁文廣嘆唔夠精力

身為80後嘅梁文廣正值精壯之年，佢日前出席一個網台節目當中就提到，佢同好多後生仔一樣，往日就算上網打機到深宵先至就寢都冇問題，翌日起身又再精神奕奕處理日常工作。之但係染疫痊愈之後，即使頭髮依然濃密，唔覺得有咩後遺症，但就明顯感覺到自己容易疲倦。佢話早前試過只不過係晚上8、9點左右，竟然睇睇吓電視會瞓着咗！慨嘆話自己呢生人從未試過咁易攰囉。

梁文廣痊愈之後，儘管理論上已有抗體，但佢認為仍要做足防疫措施，以防「二次感染」咁話。佢又話較高峰期每日幾萬宗染疫個案，近日第5波疫情似有緩和，然而單日逾千人中招仍然係大數目，呼籲大家切勿掉以輕心。