政情：預算案議員少提問未盡責辜負市民

為履行監察政府嘅責任，好多議員都會趁財務委員會審議預算案期間，向政府部門作書面提問。之不過，由於主席梁君彥早前指每名議員最多提10條問題，立法會秘書處今年就只接獲865條書面提問，比去年3,249條大減逾七成，90名議員扣除主席一人，夾埋都問唔足890條，似乎未有發揮作為代議士嘅作用喇！收到最多書面提問嘅部門係商務及經濟發展局（工商及旅遊科），有61條提問，取代舊年嘅教育局。睇嚟議員都比較關注疫下本港經濟甚至通關嘅情況。

政府喺2月底發表新一份《財政預算案》，按程序立法會議員會就預算案作出書面提問。而立法會秘書處今年一共收到865條書面提問，較舊年嘅3,249條，減少2,384條，下跌約73%。其中90名議員除主席梁君彥按慣例無提出書面問題，另外89人亦問唔足890條，每人平均提出約9.7條問題。

發問總數大跌逾7成

而收到最多提問嘅頭5個政府部門，分別係61條嘅商務及經濟發展局（工商及旅遊科），其次係財經事務及庫務局（財經事務科），有60條、第3位係食物及衞生局（衞生科），有56條，第4及第5位就係教育局同發展局（規劃地政科），分別有55條同47條提問。如果同舊年比較，商務及經濟發展局（工商及旅遊科）嘅提問急升，至於教育局則由舊年排提問榜首，今年跌至第4位。

事實上，2020年66名議員提出6,804條問題，即每名議員平均提出103條。去年提出書面問題嘅議員得番42位，每人平均提出約77條問題。主席之所以要求每名議員只能夠提出最多10條問題，並集中於事務委員會的政策範疇提問，目的是冀政府部門更能集中精力應付疫情。但結果議員都問唔足，係咪要反省吓呢？

另外，根據2017年嘅回覆提問嘅成本需要3,800萬元公帑，當年有7,321條問題，即係平均每條提問都要使接近5,200元公帑解答，如果以呢個金額計算，今年嘅成本都要近450萬元。