政情：諗過遠走加拿大 王進洋褪軚

王進洋喺舊年10月因宣誓無效取消區議員資格（DQ），被DQ後好快就搵到另一份工，轉做餐飲業。可能受到近期社運人士之間就去留問題惹起嘅爭議，佢日前喺社交平台貼文話，至今無論係仲做緊地區抑或轉為開公司從商，只要幫到近年曾參與社會運動嘅人士，佢都好佩服，又自愧冇錢、時間唔多，收咗工又好攰，仲要面對停工、復工不斷重複，但佢強調自己真係唔會咁容易妥協囉。

雖然佢話好討厭返工、放工無咗靈魂嘅自己，但無奈啲講，生存落嚟保命就係首要做嘅嘢。

咁多「同路人」棄港，選擇流亡海外，佢自爆喺前兩個月確實想走去加拿大，但最終都係決定留喺香港做下欄工作，話寧死都唔走，咁先係拎得起，放得低。佢仲話有啲曾參與社運人士見到佢喺餐廳做嘢都無言，但佢唔介意，亦都唔覺得尷尬，仲強調留低喺度最重要喎。