政情：甘文鋒留港 跑酷裁判級別迫降

其實「降呢」係同欠缺「實戰」機會有關。甘文鋒解釋話考續牌試，不但要熟讀賽例，仲要細心觀看一段跑酷短片去評分，然後國際體操聯會轄下嘅技術委員會，就會根據佢所評核嘅分數同標準答案比對，以釐定佢嘅評分水平。之但係，裁判工作好講求臨場經驗，當佢呢兩年都冇得出門，為海外嘅跑酷賽事擔任裁判，佢嘅續牌頂多只得二級資格，所以佢希望疫情快啲完結，咁就可以出席國際比賽，下次升番上去一級。

至於身為裁判，需否具備跑酷玩家嘅身手呢？甘文鋒話做裁判最緊要識睇，而佢就只掌握一啲基本嘅動作。跟住佢又話，跑酷運動目前以歐美比較盛行，相形之下香港嘅跑酷玩家就為數有限。鑑於唔少體操教練有意投入跑酷嘅世界，香港體操總會亦打算舉辦課程以培訓本地嘅跑酷教練，但奈何礙於疫情而需要押後。