政情：議員斥政府多內鬼懲處力度不成比例

5年2934公僕犯刑事僅140人免職

公務員雖然係人民公僕，但被批尸位素餐，且屢與政府打對台。因此，有議員尋日就趁立法會財務委員會討論公務員事務時，批評公務員過去違例參與反政府活動，甚至喺2019年，得7百多人嘅政務官（AO），已經有百多人發表匿名聯署信，並促政府成立獨立調查委員會，亦有政府「內鬼」喺網上散播消息，但懲處人數卻不成比例，質詢當局把關不力。公務員事務局局長聶德權回應指，當局會認真跟進違例個案，並指過去5年，有2,934名公務員干犯刑事罪行，其中140人被免職。

議員李梓敬發言時語帶不滿，指反修例風波期間，有公務員公然反政府，而發生721事件後，仲有逾100名AO發表匿名聯署信，並促政府成立獨立調查委員會，佢話猶如天之驕子嘅AO都尚且如是，咁一般公務員情況會係點呢？

李又指過去5個年度，得140名公務員被免職，另有1,080名公務員須接受紀律行動同懲處，但當中有600多人喺2019年前被懲處。佢亦指有公務員喺網上討論區散播消息，質疑政府並無認真調查，佢要求當局交代會唔會追究出席集會同參加匿名聯署嘅公務員，以及散播政府消息嘅內鬼。李亦質疑即使有宣誓，指「你信唔信成個公務員體制，18萬人裏面得百幾人係唔效忠中央㗎？」

質疑當局培訓停滯

公務員事務局局長聶德權話會視乎不同情況，會有簡易或正式紀律程序而行動。另外，聶指收到投訴後會認真處理及跟進，並依據個案嚴重程度而決定，而公務員亦以落實宣誓安排，而個別個案亦不等於整體個案。聶亦指過去5年，共有2,934名公務員干犯刑事罪行，其中140人被免職，當中78人直接革職，除了免職個案，亦有1,854宗經簡易紀律行動處理。

另一方面，議員林健鋒關注公務員學院院長仲未公布人選，而議員郭偉强亦不滿現時睇唔到任何替代公務員培訓嘅措施。聶德權指公務員學院院長招聘接近尾聲，今年上半年料有結果，而疫情對公務員培訓存在影響，因此轉向網上學習，如公務員易學網喺2021年嘅瀏覽次數為629萬次，比2019年疫情前增加33%。

聶亦強調當局對於公務員培訓「唔係咩都無做」，包括有清華講堂同網課等，亦舉行160多場憲法講座等。他亦話2022/23年度有關國家事務培訓嘅預算開支為2,900萬元，增幅係上一個年度嘅25%。