政情：田北辰為見孫兒 戴眼罩着保護衣

田二少話依家各種公務同日常事務都做核酸檢測，已經係家常便飯，但今次做檢測嘅感覺唔同，係因為內裏存在愛同責任。睇吓張相就一清二楚，佢抱住個BB，呢個係佢第7個孫仔喇！

喺孫仔未出世前，佢話阿女想保持驚喜，一直都唔知係男仔定女仔，佢就推算之前6個孫係：仔、女、女、女、仔、仔，所以估計今次第7個應該係仔，果然又畀佢估中咗，仲話同孫仔心有靈犀！咁啱佢同孫仔嘅生肖都係屬虎，話孫仔大個會唔會好似自己咁「無時停」。

佢話阿女懷胎十月已經不易，再加上疫情會更多擔心，「為母則強」，指好多媽媽爸爸都好叻，一切都係為咗小朋友健康諗，所以佢唔敢鬆懈，見孫仔前唔單止做核酸檢測，仲做好消毒、全副裝備先敢抱孫仔。