政情：改革扶貧立會火花四噴

最低工資倡年檢開徵新稅爆舌戰

本來已呈尖銳嘅貧窮問題，疫情下更形惡化。立法會大會尋日透過線上會議，就議員鄧家彪提出嘅「改革香港的扶貧政策和策略」議案進行討論。該議案內容係話香港貧窮問題嚴重，特區政府多年嚟雖不斷制訂扶貧策略但執行力度不足，長者貧窮同埋在職貧窮問題明顯，社會貧富差距進一步擴大，造成香港深層次矛盾。及後，議案經修訂後獲得通過，但記名表決時就出現技術問題，令兩名議員需「大叫」表達自己嘅投票意向喎。

此外，多位議員提出修正案，其中勞工界議員梁子穎提出，將最低工資改為一年一檢，要求改善工資金額調整機制、向應評稅利潤達一億元以上嘅高利潤企業調升1%嘅利得稅稅率等。佢發言時主張推動稅制改革，建議開徵資產增值稅等，並將新增嘅稅收投放喺扶貧政策上。

梁子穎修正案被否決

對於梁子穎嘅主張，議員陳仲尼就指佢同所屬政黨，均對開徵稅項有保留，質疑梁嘅構思未有評估對香港嘅經濟影響，強調香港要推動經濟復甦，對稅制改革要持謹慎態度。議員盧偉國亦代表其所屬政黨反對梁子穎嘅修正案，批評梁提出最低工資改為一年一檢太進取，應該勞資雙方商討，盧形容「劫富濟貧」唔可以解決貧窮問題，應避免殺雞取卵，認為創造流動機遇，先至係治標兼治本嘅扶貧策略。

議員李鎮強亦代表所屬政黨反對梁子穎提出嘅修正案，話設立負入息稅、資本增值稅、遺產稅同埋土地閒置稅等，恐怕會減低營商吸引力；反而低稅率、簡單稅制，先係香港一貫以來嘅優勢。

兩議員靠把「口」投票

去到多個修正案表決階段，梁子穎所提嘅修正案遭到否決。議員廖長江同埋江玉歡喺記名表決嘅時候，曾出現技術問題未能表決，立法會主席梁君彥建議兩名議員重新載入畫面，但都搞唔掂，最後佢哋需對住鏡頭「大叫」以表達自己嘅意向，梁及後通知秘書處將佢哋納入記名表決結果。