政情：母愛滿載 方龍飛樂做「褲二代」

方龍飛尋日喺Facebook貼文，話自己一家來自草根階層，喺知慳識儉嘅母親薰陶下，由細到大對物質都只係保持基本要求。自第5波疫情開始，佢需為若干需要居家隔離嘅街坊送食物同埋防疫用品，多咗出勤工作，不知不覺行到褲襠都磨損喎。而佢嘅媽媽就拎出收藏喺鐵盒內嘅針線，並從一塊舊布簾剪出一小塊，默默地縫上褲襠磨損位置，避免佢尷尬或者造成浪費。

佢話早前同媽媽先後確診新冠肺炎，兩人均已康復，所以見到一頭白髮嘅媽媽康復後如往常拎起針線，真係覺得好欣慰啊。佢又話媽媽雖然係一個無受高等教育兼且唔打得嘅女人仔，但理解佢嘅工作，無令屋企添煩添亂之外，更默默為家庭補縫修漏。佢形容「飛媽愛在心，阿飛着在身」，佢呢條「阿媽哩」比任何名牌更舒適，仲話着咗唔好叫佢除番落嚟，叫大家唔好笑佢咁話喎。