政情：梁熙憶往事 細個着家姐泳衣

尋日係兒童節，梁熙喺社交平台貼文兼上載咗兒時照片。佢話成日講「睇住細佬」，唔係謙虛，因為佢真係「細佬」。佢喺家中排行最細，話對上有阿哥同家姐，分別大佢7年同3年，阿哥同家姐着過、用過嘅嘢都會留番畀佢啦，又話自己細個時物資豐富，但全部都係舊嘅，當中包括家姐着過嘅泳衣。

唔知佢係咪當時年紀仲細，唔知泳衣有分男女，但佢話長大後先發現呢種係「滿滿的愛」，都係一種回憶，三姊弟喺嬉鬧中成長。話時話，佢話細個個樣好似女仔，係咪因為咁着咗家姐嘅泳衣呀？

疫情下實施禁聚措施，學生提早放暑假，佢話隔離嘅生活令小朋友好悶，尤其係獨生嘅，更令佢懷念以前嘅日子。佢希望疫情快啲過去，令小朋友可以盡情咁玩，一次過補番晒過去兩年嘅失落咁話。