政情：唔使投票 鄧家彪勢觸礁

喺早段日子，立法會無論大會同各事務委員會都改以遙距視像會議方式進行，大會更加係壓縮議程，而本周三大會實際上喺處理番1月26日嘅議程，屆時會恢復處理口頭質詢同書面質詢，同時會處理鄧家彪動議嘅「改革香港的扶貧政策和策略」議案。呢個動議旨在促政府動用一切力量推行全方位減貧措施，包括就減少貧窮人口和縮窄貧富差距制訂具體目標、落實具社會財富再分配功能的民生同財政措施等。

等咗兩個幾月，可謂等到頸都長，終於等到動議辯論自己提出嘅動議。阿彪話因為涉及多名議員嘅修訂案，估計係首個使用遙距表決嘅立會議題。佢仲做埋游說，話如果到時同事一致同意佢嘅議案，就唔需要遙距表決嘞！

老實講，呢個動議已經有8個議員提出修訂，佢哋都係想自己嘅修訂動議獲得通過。唔知阿彪話唔使用遙距表決呢個游說嘅理由充唔充分呢？係咪可以令到其他8名提出修訂嘅議員回心轉意呢？大家要拭目以待。

不過，有參與尋日遙距表決綵排嘅陸瀚民，最後就得出一個結論，話議員遙距記名表決嘅最好方法就係「坐定定」用上一部手機、一部iPad，同一部電腦。

陸瀚民仲話立法會因疫情採用遙距會議已經有個幾月，其實由商界學界到政界，網上會議、網上課堂、網上記者會都係新常態，依家市面邁向復常，相信立法會亦都係時候要開始思考疫後嘅復常同重建方略喎。