政情：郭玲麗司機 做過林琳老公保母車姨姨

林琳尋日喺Facebook貼文，話喺舊年底選舉嗰排有時都會坐郭玲麗嘅順風車，同佢司機芳姨搭下嘴，傾吓偈，所以都好熟絡吓。點知前日郭突然好認真咁問佢，話芳姨有啲私人嘢想問吓佢，「你老公細個係唔係讀×××幼稚園㗎？芳姨細個應該車過佢，話佢細個好得意，依家個樣都冇變過。」林琳本來都諗住邊有咁啱㗎，但之後問番老公真係讀嗰間幼稚園喎，忍不住感嘆「喂啊！有無咁橋（蹺）啊！」

佢又引述芳姨所講，指佢老公細個好得意，所以成日搣佢，芳姨仲記得佢老公以前坐邊個位添！林琳隨文貼上一張老公細個嘅學生相，以及近日幫手做義工嘅口罩相，話要畀大家參考吓，覺得芳姨連佢老公戴住口罩都認得出實在係太神奇喇。貼文下有網民留言指佢老公個樣的確冇乜點變過，而郭玲麗都有留言話，事實證明世界真細小啊！