政情：失蹤大半年蒲頭鄭家朗去年離港赴英

不認還須認

曾被指潛逃海外嘅前香港眾志副主席鄭家朗，儘管曾矢口否認，但終究難掩已經離港嘅事實，前晚喺社交專頁貼文，承認自己已身處英國。佢又話離開香港嘅一年並唔好過，目前正獨自生活嘅佢每天經歷着對自己、對人生、對未來規劃嘅反思。佢又語帶感慨咁話，香港嘅現況並非天真嘅浪漫故事。加埋佢去咗英國，前眾志嘅核心已經四散，前秘書長黃之鋒仍在還押中。

曾因眾志出售懷疑附有虛假產地以及效能聲稱嘅口罩，鄭家朗同幾位人士因涉嫌違反《商品說明條例》而遭到拘捕，其後獲准保釋候查，但亦多次流傳佢離港出走嘅消息，例如前年7月就有傳媒指佢潛逃台灣，佢當時就解釋，只因家庭及私人事務一度短暫離開香港。佢嘅社交網站喺去年6月17日之後就再冇更新消息，直至前晚佢貼文交代近況，話當大家看見呢段文字時，佢已經身處英國喇！

到底鄭家朗係透過咩途徑抵達英國呢？貼文內容並無提及，只係指過去一年出於種種原因，無法交代自己嘅行蹤，只可以話離開香港嘅一年當中絕對談不上好過，每日隔岸目睹所愛嘅家鄉日復沉淪，已變得不似舊貌，覺得此刻無法身在香港同大家共同對抗，感到十分沮喪喎。

前眾志核心成員四散

現時需獨自生活嘅佢話面對好多挑戰，小至每個夜闌人靜嘅獨處時間，大至美艷而使人哆嗦嘅雪路，都往往令人感到唔習慣。為教育海外香港下一代保存對香港價值、文化及歷史認同，所以佢同一批散居各地嘅港人共同編寫一啲教材，期望藉此保留畀下一代自由思考、了解真相嘅權利。

隨住鄭家朗自爆已赴英一年，可見前眾志嘅核心成員已四散，例如被通緝嘅前常委羅冠聰比鄭家朗更早去咗英國、前秘書長黃之鋒因多宗案件被判刑，而喺3月初已坐完23.5個月監，但涉民主派35+初選案轉到赤柱監獄繼續還押；前成員周庭因2019年6月21日參及煽惑包圍警察總部嘅未經批准集結被判監10個月，去年6月刑滿出獄，而同案嘅前主席林朗彥亦被判監7個月，喺舊年4月12日出獄。