政情：入境處聯同慈善團體送暖 處長區嘉宏落區派抗疫包

有份參與是次活動嘅入境處高層，仲有副處長郭俊峯、助理處長戴志源、入境事務學院院長康凱等。區嘉宏指作為紀律部隊嘅入境處一直走在抗疫最前線。喺疫情初期就已協助身處內地及海外嘅港人平安返港，又派同事參與個案追蹤辦公室嘅工作，以及封區強檢等行動。因應第5波疫情，入境處亦派出超過900位同事於青衣、新田及洪水橋3個社區隔離設施工作，並同時成立關愛隊，以照顧有特別需要嘅人士，如長者、小童、殘疾人士同少數族裔等，務求入住人士安心隔離，早日康復。

此外，入境處人員亦為內地專家及支援人員處理來港嘅出入境安排，冀盡快遏止疫情，確保香港市民生命安全同身體健康。

至於尋日派發嘅抗疫包，內裏就包括維他命C、消毒搓手液、快速檢測劑、口罩、保健湯包及乾糧等實用物資。仁濟醫院董事局主席葉恭正就話，好高興同入境處合作，並衷心感謝區嘉宏處長、各位長官及人員嘅落力參與。未來亦將會繼續與不同嘅政府部門及單位合作，齊心抗疫。