昔日東方政情：禁追租闖關步步維艱
政府冀趕月底通過 議員炮轟問題多多
疫下湧現結業潮，政府急急推出暫緩追租條例草案補救，規定業主喺3個月嘅「保護期」內，唔可以追討租戶自今年1月1日至「保護期」屆滿期間內嘅租金。雖然草案經過多次修訂同討論，但睇嚟都係不得業主同議員歡心，要通過似乎有一定難度喎！有議員尋日就喺立法會法案委員會上繼續「發炮」，批評草案違反合約精神，生效日期表述屬「語言偽術」，況且禁追租具追溯力，同普通法原則不符。財政司司長私人辦公室顧問卓永興就強調，政府目標喺本月27日嘅立法會大會通過草案，而禁止追租只於法例刊憲後生效，重申政府嘅措施不僅保護中小企，亦係防止企業大規模倒閉。
違合約精神 「語言偽術」
地產及建造界議員龍漢標對草案一直都好不滿，指條例違反合約精神，加上條例欠租期訂喺今年1月1日開始，批評政府指措施喺法例刊憲後生效係「語言偽術」，亦同普通法不具追溯力嘅做法相違背。佢又話措施涵蓋範圍太廣泛，連未受疫情影響嘅大型租戶都包括在內，認為係遠超政府立法原意。
卓永興回應指同律政司研究後，認為禁追租並無追溯力，亦否認係「語言偽術」，強調政府只喺法例刊憲後禁止追租，但欠租期則有需要由今年年初開始計算。卓又話月前當措施公布後，已有發展商入稟向租戶索償，涉及70多宗個案。卓又強調，政府嘅措施唔單止係保護中小企，而係防止企業大規模倒閉，認為措施符合立法原意。
至於條例規定業主同租戶喺保護期內所簽訂嘅租金協議，可獲豁免於法例之外，議員邵家輝則關注協議係咪要交畀政府做證明。而議員陳紹雄就問政府有無估算暫緩追租嘅成效，認為欠缺評估之下去干預市場，擔心會得不償失。
認推得急 難做受惠調查
卓永興表示無要求業主同租戶將協議抄送政府，因為協議只等同一般租約，卓強調基本法有保障個人財產權嘅規定，而當局亦都無令業主失去財產權，只不過係延遲收租時間。卓永興又估計措施可惠及10多萬商戶，但由於法例推行急切，當局未能做到較大型嘅調查，實際嘅受惠人數未能預視。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
