政情：大女上網課容海恩被叫行開

Eunice話自從舊年2月開始，兩個囡囡到依家基本上都係上網課，大約得4至5個月係實體上堂。雖則話小朋友上網課最好都係有家長陪同，但Eunice發現3歲嘅大女竟然好「早熟」，上英文堂嗰陣，竟主動叫媽媽行開吓。佢話大女無解釋原因，但估計可能想同老師講啲比較深入嘅事情，始終媽媽喺隔籬會有壓力，唔係幾好意思咁囉。

佢又話兩個囡囡年紀尚小，差唔多一出世就面對疫情，以致習慣留喺屋企，所以都無成日要求出街，而Eunice都會教兩個囡囡，父母要工作、開緊會，而佢哋都會好識做，唔會打擾爸爸媽媽。

雖然兩位囡囡無特別要求出街，不過Eunice前日趁住同大女外出打針，順便搵埋佢做小助手，一齊去咗老人院派抗疫物資。佢話大女之前都試過幫手喺街站派傳單，都幾享受過程㗎，Eunice話藉住義工服務，增加小朋友同人接觸嘅機會，性格都會熱情啲。