政情：防疫搞錯罰則 腦殘政府咁都得?!

食物及衞生局喺本周二晚發稿，指修訂《預防及控制疾病規例》（第599J章），調高不遵從強制檢測指示、強制檢測公告，以及圍封強檢下嘅相關罪行罰則至最高2.5萬元及監禁6個月，有關修訂已於尋日（3月31日）起生效。惟本報前晚翻查港府向立法會提交嘅文件，赫見《主體規例》第16（1）條所訂罪行（沒有遵從強制檢測令下的規定）及第19E（2）條所訂罪行（沒有遵從限制與檢測宣告下的規定）嘅罰則，由第4級罰款（2.5萬元）及監禁6個月，加重至第5級罰款（5萬元）及監禁6個月，數字與周二公布嘅罰款2.5萬元及監禁6個月有出入。

其後政府於前晚晚上10時32分發文更正，意味當局周二發出嘅新聞稿，錯誤將強制檢測公告同封區強檢嘅違例罰則，一同訂為第4級罰款。當局周三晚，即相隔超過24小時後，先至再發稿更正，距離生效時間不足1.5小時，將強檢罰則拆分為兩類。圍封行動中沒有檢測人士嘅罰則分級，較未有遵循強檢公告人士更嚴重，兩者嘅最高罰款相差一倍。

當中不遵從強檢指示和公告人士嘅最高刑罰，維持喺2.5萬元及監禁6個月；而圍封強檢大廈嘅居民，若不遵從相關強制檢測指示，罰則會進一步調高至最高罰款5萬元及監禁6個月。當局表示，新修訂嘅罰則，可加強阻嚇力並維持不同罰則之間嘅分級。