政情：吳永嘉做校委 冀挽回港大形象

吳永嘉話，自己喺港大畢業，今次被選入港大校務委員會非常開心，可以貢獻母校。至於港大近幾年因人事任命所掀起嘅爭議、以及學生捲入社會運動漩渦，有咩辦法改變外界對母校嘅負面印象？佢就話入到校務委員會嘅目標，希望加強學生嘅國民身份認同、認識國情。

至於學術層面，吳永嘉話會增加學術研究、舉辦多啲國內外交流，但係佢話都要逐步逐步嚟，因為港大自己都有好多目標方向。

連同吳永嘉，日前立法會文件宣布葉劉淑儀、張國鈞、鄭泳舜及吳秋北等5位議員獲選加入香港大學校董會。佢哋繼而相互之間作出一項提名，以供港大校務委員會考慮以個人身份委任為其成員。而相關議員則同意提名吳永嘉，港大亦已獲悉此事。