昔日東方政情：搞新慈善組織 招國偉擔正做主席
正所謂政治一日都嫌長，何況係幾年。話說喺公屋聯會做咗將近9年總幹事嘅招國偉竟然另立門戶，成立嘅新組織由自己擔正做主席。莫非佢打算脫離公屋聯會，應驗「合久必分」呢句話？
易申撥款 助推展基層住屋
新成立嘅組織其實係一個慈善團體，全名叫做「公屋聯會安居服務社有限公司」，好容易令人聯想到「公屋聯會」，但係招國偉強調兩者互不從屬，後者係側重於政策倡議，不時會通過問卷調查或請願，向當局反映基層嘅需要同訴求。
之但係，佢發覺某啲政府撥款嘅項目，前提係受惠對象必須係慈善團體，因此佢以成立非政府組織嘅方法，另立一個慈善團體，唔單止將目光擴展到過渡性房屋，亦便於申領撥款，以推展或落實有關基層住屋嘅政策倡議。
佢又重申，以社團註冊嘅「公屋聯會」其實都可以問政府申請撥款，只不過限制會比較多。
咁依家做埋慈善組織嘅主席，佢又會唔會倣效其他慈善組織，舉辦賣旗活動或籌款晚會呢？佢話唔排除將來會咁做，但依家礙於疫情，籌款活動都係遲吓先再諗啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
