政情：非選區居民唔幫譚香文叫人搵白鴿黨

譚香文前日喺社交平台貼文，話佢嘅地區辦事處近日經常接獲當區以外居民求助，甚至喺周日同晚上都有人打畀佢，有人話係某泛民前區議員透露佢嘅電話。佢就發聲明，強調所屬選區僅為黃大仙25個選區之一，無額外資源服務整個黃大仙區；各議員向來尊重各自選區範圍，互不干涉各自選區事務；自區議員集體辭職後，民政事務處冇為餘下各區議員增加任何資源。因資源同人手有限，由前日起所有非「龍星區」居民查詢，議辦將不作處理。

唔單止咁，聲明仲話區內其他居民如有查詢可直接向黃大仙民政署求助，或直接向其他政黨求助。之後，就留低咗多個政府部門電話，主要政黨方面，竟然係留咗白鴿黨總部嘅電話。

有網民睇到呢個電話都奇怪，為乜要列出白鴿黨嘅電話？有網民更質疑點解唔列出佢出身嘅人民力量甚至公民黨嘅電話呢？睇怕只有佢先知。