政情：修訂病假包括檢疫容海恩想做主席

因《議事規則》修訂後，法案委員會上限為15人，今次16個議員以個人身份要爭餘下嘅4個位，抽籤後，最終由議員邵家輝、容海恩、江玉歡同黎棟國取得餘下4個席位。而有勞工背景嘅5名議員都未能躋身委員會，僅得勞聯嘅林振昇孤軍作戰。

容海恩話正爭取緊出任主席嘅提名，邵家輝就話想留喺主席台下問問題，話例如員工隔離期間視為病假固然係好事，但唔可以每次政府做好人，但要商界「埋單」嘛！本以為勞資雙方會喺呢件事上有矛盾啦，點知林振昇回應時都話，雖然員工染疫嘅話，僱主都有責任，但畢竟新冠肺炎係特殊情況，對「拖政府落水」，都持開放態度喎。

另外，審議暫緩追租嘅《商業租戶短期保護措施（2019冠狀病毒病疫情）條例草案》嘅委員會又出現超額申請嘅情況，最後18名議員抽籤爭奪最後兩個席位，兩位幸運兒包括邱達根。聽聞，議員張宇人有意出任主席，皆因佢代表嘅飲食界，同埋該黨嘅邵家輝代表嘅批發及零售界，喺禁追租方面影響較大。