重用新進問題多 國泰炒人種惡果

對於重啟見習機師培訓計劃，國泰聲稱係對於香港作為首要航空樞紐嘅長遠發展同未來充滿信心，為咗航空業復甦而做好準備，又話好重視人才喎！嗱，明眼人都睇得穿，呢啲語言藝術純粹係公關技巧，信佢一成，都雙目失明啦。事實上，國泰喺疫情期間，為咗節省開支，曾大規模裁員，各部門都可謂「血流成河」；而且國泰愈做愈縮，就連員工都頂唔順，紛紛「跳船」逃亡。喺裁員加上離職潮夾擊之下，國泰嘅機組人員長期不足；雖則話喺去年夏季起，國泰已開始重新招聘本地機師，但個朵做到臭晒，又有幾多人肯返嚟，結果國泰咪將目光放喺新人之上囉！

針無兩頭利，培訓新人嘅好處多多，但假如係因為有經驗嘅機師不足，被迫起用新人呢，反而係百害而無一利。有別於其他行業，民航機師培訓又點會可以喺數年內完成咁簡單呢；機師學成之後，都仲要不斷累積飛行時數，吸收經驗，喺呢個時候，「以老帶新」就顯得相當重要！國泰先前毫無遠見，選擇向人才開刀嚟換取短暫利益，家吓惡果咪浮現囉！

爛泥邊有咁易扶得上壁，國泰近幾年經營不善，港府屢屢注資救亡，國泰都可以由當年嘅雄鷹，變成依家嘅雞仔，講到尾就係咎由自取，完全唔值得同情。最可憐係港人，辛辛苦苦賺得雞碎咁多，拎嚟交稅之後，港府一個屈尾十就將大大筆公帑掟畀國泰，根本同掟入鹹水海冇分別！呢個「無底深潭」獲注資之後，唔見起死回生，亦冇造福港人，反而繼續同港府私相授受，縱容機組人員免檢疫入境，引爆本港第5波疫情，死得人多，簡直就係恩將仇報，食碗面反碗底！

香港本輪疫情至今，已經有超過7,000名港人喪生，連同回歸25年嘅經濟成果都被一鋪清袋，造成如今呢個局面，國泰係脫不了關係！所謂「善有善報，惡有惡報；不是不報，時候未到」，除咗追究喺疫情中失職瀆職官員嘅責任之外，國泰被問責追責，似乎係勢在必行！與其高調宣布埋啲無厘頭計劃，國泰倒不如諗吓點造福港人，獲得市民諒解，換取未來「減刑」好過啦！